පුත මේ මිහිතලයම ඔබේය

මේ පුංචි  පැදි පේලි ටික මට හම්බවුනේ අපේ පුංචිගෙ පොතක් අස්සෙ තිබිලා. රෝස පාට පුංචි කොලේක ලියපු පැදි පෙලක්. ඒ මීට අවුරුදු 15-18 කට විතර කලින්. එක හුස්මට කියවල දැම්ම ඒ පද පේලි ටික මගේ හිතට අමුතු වෙනසක් කලා. පසු කාලීනව හොයාගත්තා ඒ පැදි පෙළ ලියපු අයිතිකාරයා බ්‍රිතාන්‍ය ජාතින රඩ්යාඩ් කිප්ලිං කියල. ඔහුගෙ ඉතාම ජනාදරයට පාත්‍රවූ ඉ‍ෆ් (If) නැමති පැදිපෙලේ පරිවර්තනයක් තමයි මම ඉස්සෙල්ල දැකල තිබ්බෙ. මම ඉස්සර මේක මගෙ බ්ලොග් එකක දාල ඒක කියවපු හුඟ දෙනෙක් මගෙ යාළුවො වුනා. ඒ වගේම මගේ ජීවිතේ මට කිට්ටුවෙන් හිටපු හුඟදෙනෙක් මේ පැදිපෙළට ඉමහත් ආදරයක් දැක්වුවා. මගේ ජීවිතේ ලොකු වෙනසක් කරන්න සමත් වෙච්ච උදාර වචන ගොන්නක් එහි අඩංගු වුනා. පස්සෙ පොඩියට මුද්‍රණය කරගෙන පසුම්බියෙ දාගෙන ඉන්න තරම් මම ඒකට වශීවුනා. අදටත් හිතට අමුත්තක් දැනෙන හැම වෙලාවකම මම මේ පැදි පෙළ කියවනවා.

මුළු ලෝකයාම ඔබට දොස් නගද්දිත්

එයින් කම්පා නොවී සිටීමට ඔබට හැකි නම්

ලෝකයා ඔබ කෙරෙහි තරහක් දක්වද්දී

ඔබ තරහක් නොදක්වන්නේ නම්

මුළු ලෝකයාම ඔබව සැක කලත්

ඔබට ඔබ ගැන විශ්වාසයක් ඇත්නම්

අන්‍යයන් ඔබව බොරුවෙන් රවටද්දී

ඔබ බොරු නොකියයි නම්

ඔබේ හොඳ ගතිගුණ ඔබ නොකියයි නම්

ඔබට කොතෙකුත් දෑ සිතිය හැකි වුවත්

ඔබ මහා චින්තකයකු යයි නොසිතන්නේ නම්

ඔබේ සිතුවිලි ඔබේ ඉලක්කය යයි ඔබ නොසිතන්නේ නම්

ජය පරාජය දෙකම සමව සැළකීමට ඔබට හැකි නම්

ඉවසීම ඔබගේ පුරුද්දක් නම්

ඔබ ලැබූ සියළු ජය එක් රැස් කර තැබිය හැකි නම්

එහෙත් ඒ සියල්ල වැනසී ගියත්

ඔබ සුසුම් මාත්‍රයක් පවා නොහෙලයි නම්

නැතිව ගිය සියළු ජයග්‍රහණයන්

නැවත ලබාගැනීමට ඔබ උත්සාහ වන්ත නම්

ඔබේ පිරිහීම හෝ පරාජය ගැන

වචනයක් හෝ කතා නොකර සිටීමට ඔබට හැකි නම්

රජවරුන් සමග ඇසුරු කලත්

පොදු ජනතාව සමග ඇති සම්බන්ධතා

සිඳ බිඳ නොදාන්නේ නම්

ඔබේ ලඟම හතුරාගේත් ආදරණිය මිත්‍රයාගේත්

සිත නොරිදවන්නේ නම්

ඔබට ලෝකයාම සමාව නොදෙන එක මොහොතක

ඒ මොහොතේදී සියළු කරදර බාධක හිරිහැර

අමතක කොට සිටීමට ඔබට හැකිනම්

පුත මේ මිහිතලයම ඔබේය

ඔබ මේ මිහිතලයට අයත් පුද්ගලයෙකි

පුත ඔබ නියම මිනිසෙකි!

රඩ්යාඩ් කි‍ෆ්ලිං ගැන දැනගන්න මේ සබැඳියට යන්න

ඔහුගේ සියළු කවි නිර්මාණ රසවිඳීමට මේ සබැඳියට යන්න