ඩී
බී නිහාල්සිංහයන් මට ඉස්ඉස්ලේලාම මුන ගැසෙන්නේ 2012 වර්ෂයේ රූපවාහිනී ටෙලි සම්මාන උළෙල සඳහා මනරම් මීඩියා සොලුෂන්ස් සමග වැඩකරමින් සිටින අවස්ථාවකය. එම වර්ෂයේදී ලංකාවේ පළමු ටෙලි වෘතාන්තයට තිස්වසරක් පිරී තිබුනි. ඒ ටෙලි නාට්‍යය අධ්‍යක්ෂණය කලේ ඩී බී නිහාල්සිංහයන් විසිනි.
නිහාල්සිංහ
යන නම මා අසා තිබුනද රූපයෙන් මා ඔහු හමුවී නොතිබුනි. මුලින්ම මා ඔහු මුනගැසුනේ ලොන්ඩන් පෙදෙසේ ඔහුගේ නිවසේ දීය. අඩි හයකටත් වඩා උසැති මේ පාංශු දේහධාරී පුද්ගලයා අප නිවස තුලට කැඳවා ගත්තේ සොඳුරු සිනහවකින් ද පෙරදැරිවය.
එතැන්
පටන් අපි බොහෝ දේ ඉගන ගැනීමට වරම් ලදිමු. ඔහුගේ නිවසේ ඇති සිනමා කෞතුකාගාරයේ ඇති කැමරා ආම්පන්න පෙන්වමින් ඔහු අප දැනුවත් කලේය. ඔහු තාක්ෂණික අතින් අතිදක්ෂයෙකි. නැතිනම් ලංකාවේ පළවෙනි ටෙලි නාට්‍යය ඔහුවිසින් අධ්‍යක්ෂණය නොකරනු ඇත.
ලංකාවට
ගෙනා පළමු කැනන් 5D Mark II කැමරාව ඔහුගේය. ඒ වෙනුවෙන් ඔහු භාවිතා කරන්නේ 28-300 ටෙලි
ලෙන්සයකි. එයින් ඔහුගත් ඡායාරූප මා සමග පෙන්වූයේ කුඩා ලමයෙකු පරිද්දෙනි. ඒ කැමරාව සහ ලෙන්සය භාවිතා කිරීමට මමද වාසනාවන්ත වූයෙමි.
ඇත්තෙන්ම එවන් බර ලෙන්සයක් භාවිත කල හැක්කේ ඔහුවැනි “හයේ හතරේ“ පුද්ගලයෙකුට පමණි.
“රුචිර ඔයත් මාක් ටූ එකක් ගන්න“
මා දකින හැම වෙලාවේම මට ඔහු පැවසුවේ එයයි.
ඔහුට මගේ නම මතක ඒ ලෙසය.
ලංකාවේ
පළමුවැනි සිනමාස්කෝප් චිත්‍රපටය ඔහුගේය. ඒ වැලිකතරය.
ඒ ගැන හැමතැනම කතා වන නිසා වැඩි යමක් මම නොපවසමි.
අද
වසංගතයක් සේ පැතිරුණද ලංකාවට වෙළඳ දැන්වීම් කලාව රැගෙන ඒමේ මූලිකයෙක් වූයේද නිහාල්සිංහයන්ය.
“පුතා ඔයා දන්නවද මගෙ තාත්තව. එයා තමයි ඩී බී ධනපාල“
වරෙක
ඔහු මගෙන් විමසූ පැණයට ඔහුම පිළිතුරු දුන්නේය. ඒ අතර තුරදී ඔහුගේ ඩී වී ඩී පුස්තකාලය මම පරිහරණය කලෙමි.
“බැලුවට කමක් නෑ. ගෙනියන්න දෙන්නෙ නෑ“
ඔහු
සිනහවෙමින් පැවසූවත් එහි ඇති අරුත වූයේ කළින් අරං ගිය අය ඉතාම හොඳින් නැවත ලබා දුන් බවයි.
පළමු
දිනයේ ඔහු හා ගෙවූ පැය කිහිපය තුල ජීවිතයට බොහෝ පාඩම් එකතුවිය.
- වැදගත්ම දේ කිසියම් වෘත්තියක ප්‍රවීනයෙක් වීමට ඔබ සෑම කරුණක්ම ස්පර්ශකොට තැබිය යුතු බවය
- තවත් දෙයක් නම් ඔබ ප්‍රවීණයෙක් නම් එම වෘත්තියට සම්බන්ධ අනෙකුත් කරුණුත් මදක් හෝ දැන ගත යුතු බවය. (ඔහු සිනමාවේ ප්‍රවීනයෙකි. ඒ අතරම ඔහුට ඡායාරූපකරනය හා අනෙකුත් තාක්ෂණික විශයයන් ගැන විශාල දැනුමක් විය)
- කෙතරම් “පොරක්“ වුවත් සරල විය යුතුය.
තිස්
වසරකට පෙර නිපදවුවද දිමුතු මුතු ටෙලි නාට්‍යෙය් සියළුම ශිල්පීන් (නළු
නිළියන් / තාක්ෂණික ශිල්පීන් සහ අනෙකුත් සෙසු ශිල්පීන්) මුල අකුරු සමග නමින්ම ඔහුට හොදින්ම
මතකයේ තිබුනි. ඒ සඳහා ඔහුට නාට්‍යෙය් නාමාවලිය බැලීමට අවශ්‍යයතාවයක්
නොවීය.
තවත්
දවසක උදයම අපගේ කාර්යාලයට ඔහු පැමිණියේ දිමුතු මුතු වෙනුවෙන් සංස්කරණය වන Rushes සඳහා
තමන්ගේ දායකත්වය ලබාදීමටයි. එහිදී
නාට්‍යෙය් හැම ශිල්පියෙකුටම අවශ්‍යය පැසසුම ලබාදීමට ඔහු අමතක නොකලේය. මේ අතර වාරයේ
තවත් බොහෝ දේවල් ඔහුගෙන් අසා දැනගතිමු. ලංකාවේ පළමු වැනි ටෙලි නාට්‍යය රූගත
කිරීමේදී ඔවුන්ට මුහුණ දීමට වූ කෝටියක් තාක්ෂණික ගැටළු සහ ඒවාට ඔවුන් ලබාගත්
විසඳුම් ඇත්තෙන්ම පුදුම සහගතය. මන්දයත් ගැටළුවක් පැණ නැගුන විට විසඳීමට ඒවන විට
ලංකාවේ අත්දැකීම් ඇති කෙනෙක් නොසිටි නිසා ඔවුන්ම ඒ වෙනුවෙන් වෙහෙසී පිළිතුරු
සොයාගත් නිසාත්ය.
නොදන්නා
යමක් ඔහුගෙන් විමසීමේදී ඔහු ඒ හැමදෙයක්ම ඉතාමත් පැහැදිලිව සරලව කියා දුන්නේය.
නිහාල්සිංහයන් ගේ නම කියැවෙන හැමතැනකදීම අපි සර් කියා කටපුරා කියන්නේ ඒ නිසාය.
ඔහුගේ
නිවස තුල ඔහුට නැරඹීමට කුඩා ප්‍රමානයේ සිනමා ශාලාවක් විය. අප ඔහු මුණ ගැසුනු දෙවන දවසේ එහි ක්‍රියාකාරීත්වය අපට පෙන්වීය.
“පුතා හිතන්නෙ මම ෆිල්ම් කීයක් කරල ඇති කියලද?“
සිනමාවේ
පතාක යෝධයෙක් මගෙන් අප මුනගැහුනු වරෙක එසේ අසයි.
මම ඒවනවිටත්
ඔහුගැන හරියටම නොදනිමි.
“පහලවක් විතර“
ඒ
මගේ පිළිතුරයි. මගේ පිළිතුරට ඔහු මද සිනාවක් පා
“අපෝ එච්චර කලා නම් මොකද. මම කලේ ෆිල්ම් 4යි“
එදා
හවස මගේ ස්ව අධ්‍යයනය වූයේ ෆිල්ම් 4ක්
කල කෙනෙක් පතාක යෝධයෙක් වූයේ කෙසේද? යන්නයි.
එදින හවසම
මට ඒ සඳහා පිළිතුරක් ලැබිනි.
ඔහුගේ
කාමරයේ බිත්ති වල පිටරට (මගේ මතකය හැටියට නම් එය ඉන්දුනීසියානු හෝ මැලේසියානු)
චිත්‍රපටයක ප්‍රචාරක පුවරු කිහිපයක් සවිකර තිබුණි. ඔහුගෙන් එය විමසූ විට එම චිත්‍රපටය
ඔහුගේ නිෂ්පාදනයක් බවත් එය ඒ වසරේ එරට වැඩිම ආදායමක් ඉපයූ චිත්‍රපටය බවත් දැනගත
හැකිවිය.
ඔහු අධ්‍යක්ෂණයේ
පරතෙරට ගිය අයෙකි. වීඩියෝ කලාවේ අ යන්නවත් නොදත් මට රූපවාහිනී ටෙලි සම්මාන උළෙලේ Rushes වෙනුවෙන් ඔහුව අධ්‍යක්ෂණය
කිරීමට සිදුවිය. (එය අධ්‍යක්ෂණයක් නොව ආයාචනයක් යයයි මම සිතමි)
“රුචිර ඔයාට
ඕනෙ විදිහ කියන්න. මම ඔයාට ඕනෙ විදිහට ඇක්ට් කරන්නම්. මම ලොක්කෙක් වුනාට මෙතන දැන්
ඔයයි ඩිරෙක්ටර්“
ඔහු එවන්
පුද්ගලයෙකි. කොළඹ 7 ජීවත් වුනාට බී එම් ඩබ්ලිව් රථයක් තිබුනාට (බොහෝ විට අප මුන
ගැසීමට ඔහු එය පැදවූයේ තනිවමය) ඔහු මිනිසුන් සමග ගැවසුනු මිනිසුන් සමග ජීවත් වුනු සොඳුරු
මිනිසෙකි.
2012
රූපවාහිනී ටෙලි සම්මාන උලෙල අවසන් විය. උළෙල අවසන් වූ පසුත් මේ සොඳුරු මිනිසා
අපහමුවට පැමිණ අපට සුබපතා යන්නට ගියේය.
පසු සතියක
මම ඔහුගේ ඡායාරූපයක් ගෙන එය රාමු කර ඔහුට බාරදීමට නිවසට ගියත් ඔහු නිවසේ
නොසිටියේය. මම එය නිවසට බාර දී ගෙදර ඒමටත් පෙර එතුමා මා ඇමතීය.
“මං
කවදාවත් හිතුවෙ නෑ මෙහෙම දෙයක් මට හම්බවෙයි කියලා. ඔයා මාව අවුරුදු ගානක් තරුණ
කරලා පොටෝ අරං. මට ඔයාව හම්බවෙන්න ඕනෙ“
මම යන්තම්
ගත් ඡායාරූපයට එතුමාගේ ඇගයීම මට මහමෙරක් තරම් විය. මට එතුමා මුණ ගැසීමට නොහැකි
වූවත් එතුමා මාවෙනුවෙන් ස්තුති පත්‍රයක් එවා තිබුණි. එය මා ඡායාරූපයක් වෙනුවෙන් ලද
පළමුවෙනි සහ එකම ස්තුතියයි.
එයින් පසු
එතුමාව මට මෑතකදී මුණ ගැසුනේ ප්‍රවීන ඡායාරූප ශිල්පී නැසීගිය නිහාල් ප්‍රනාන්දු
මහතා වෙනුවෙන් පැවති අනුස්මරණ උත්සවයකදී ප්‍රධාන කථිකයා ලෙසය.
එහිදී ඔහු
කීවේ “The නිහාල් ගැන A නිහාල් කෙනෙක් කතා
කරන්න යන්නෙ“ යනුවෙනි. නිහාල් ප්‍රනාන්දු මහතා එතුමාගේ සමකාලීන මිත්‍රෙයක් වුවත්
එතුමා පිදිය යුතු මිනිසුන් පිදුවේ ඒ ආකාරයෙනි.
දයාබර
නිහාල්සිංහ සර්..
ඔබ යුග
ගනනාවක් බිහිකල යුග පුරුෂයෙක් විය. ඔබ බිහිකල යුගවල ඔබ නැති අඩුව සදාකල් දැනෙනු
ඇත.
සර්.. ඔබට
නිවන් සුව අත්වේවා!!!
-----------------------------------------------------
ඡායාරූප
1. එතුමා වෙනුවෙන් මා ලබාගත් ඡායාරූපය
2. එතුමාගේ සිනමා කෞතුකාගාරය
3.එතුමාගේ සිනමා කෞතුකාගාරය
4.එතුමාගේ සම්මාන ස්වල්පයක්
5.එතුමාගේ සිනමා කෞතුකාගාරය
6.එතුමාගේ 5ඩී මාක් 2 කැමරාව
7.එතුමාගේ 5ඩී මාක් 2 කැමරාව
8.එතුමාගේ 5ඩී මාක් 2 කැමරාව. එතුමාගේ විදේශීය චිත්‍රපටයේ ප්‍රචාරක පුවරුක කොටසක්ද දැක්වේ
9.වැලිකතර ප්‍රචාරක පුවරුව
10. දිමුතු මුතු නාට්‍යෙය් දර්ශනයක්
11. මනරම් මීඩියා ශිල්පීන් සමග
12/13 - එතුමාව රූගත කිරීම
14. මම ලද ස්තුති පත්‍රය
15. ඩී බී නිහාල්සිංහයන්
